Առցանց ուսուցման առաջադրանքներ 6-րդ դասարանցիների համար (հունվարի 18-22)

Հունվարի 18

Բացատրի՛ր ասացվածքները.

Աղվեսի վկան իր պոչն է:

Աղքատին ով է տվել արքայություն: 

Ամեն բանի վերջն է գովելի:

Աղոթքն իր տեղն ունի, թուրն՝ իր տեղը:

Ներկայացրո՛ւ, թե քո ընտանիքի անդամները ի՞նչ ասավածքներ են օգտագործում 

իրենց խոսքում, ինչ իմաստ ունեն դրանք և ո՞ր դեպքում են ասվում 

( գրում եք 10 նախադասությամբ, աշխատանքը դնում եք բլոգում, հղումն ինձ եք 

ուղարկում):

Հունվարի 19

 <<Առականի>> բլոգի առակներից 5-6 առակ կարդա, վերլուծիր, վերլուծությունները դիր բլոգումդ, հղումն ինձ ուղարկիր։

Հունվարի 20

Գործնական քերականություն

1. Ընտրի՛ր և ընդգծի՛ր ճիշտ պատասխանները.
ա) բառերն ըստ կազմության լինում են պարզ և ածանցավոր
բ) բառերն ըստ կազմության լինում են միավանկ և պարզ
գ) բառերն ըստ կազմության լինում են պարզ և բաղադրյալ

2. Լրացրու կիստ թողած մտքերը.

ա) Պարզ են կոչվում այն բառերը, որոնք.................................................................................:

բ) Ածանցավոր են կոչվում այն բառերը, որոնք.......................................................................:

գ) Բարդ են կոչվում այն բառերը, որոնք.........................................................................................;

դ) Բարդածանցավոր են կոչվում այն բառերը, որոնք................................................................................:

3.  Սխալ կամ ոչ տեղին գործածված բառերը գտի՛ր և փոխարինի՛ր հարմար հոմանիշներով:

Նրան աշխատանքից փրկեցին, որովհետև անպատասխանատու էր ու ցրված:

Մատիտներիդ մեջ կապույտի բոլոր գույները կա՞ն:

Ծանոթիս այդպես էլ չգտա թանձր բազմության մեջ:

Ընկերները երկու օր առաջ էին մաքառել ու հաշտվելու փորձեր էին անում:

Բերրի խոստումներ տվեց ու գնաց:

4.  Ընդգծված դարձվածքները փոխարինի՛ր հոմանիշ բառերով:

Փարիզից Վարշավա թռչելիս լեհ կինոդերասան Ցիբուլսկու աչքով ընկավ, որ կողքի ուղևորը սիրտը դող ընկած նստած է: Նա փորձեց հարևանին սիրտ տալ:

- Մեր օրերում ինքնաթիռով թռչելը դատարկ բան է,- ասաց,- նույնիսկ ավտոմեքենան ավելի վտանգավոր է: Էս քանի օրը բարեկամներիցս մեկի մեքենայի գլխին ինքնաթիռ ընկավ:

5.  Տրված դարձվածքներն արտահայտի՛ր մեկական բառերով:

Պատի ծեփ դառնալ, պայման կապել, քիթը կախել, բերանը բաց մնալ, իրեն պատեպատ տալ:

6.  Տրված արտահայտություններից յուրաքանչյուրով երկու նախադասություն կազմի՛ր՝ մի դեպքում դրանք գործածելով ուղիղ իմաստով, մյուս դեպքում՝ որպես դարձվածք:

Մատը մտցնել բզեզի բույնը, լեզու առնել, մատը կծել, ոսկոր ու կաշի դառնալ, գլուխը յուղել, մատից փուշ հանել, գլխին քար գցել:

7. Ստեղծագործում եք <<Պարապություն>> վերնագրով։

(Գործնական քերականության առաջադրանքները ուղարկում եք իմ հասցեին)։

Հունվարի 21

Համացանցից գտի՚ր և անգիր սովորի՚ր Վահան Տերյանի բանաստեղծությունները,  տեսանյութ կամ ռադիոնյութ պատրաստի՚ր: Տեղադրի՚ր բլոգում, հղումն ինձ ուղարկիր: 

Հունվարի 22

Որսորդն եւ կաքաւն

Որսորդն կալաւ կաքաւ մի եւ կամէր զենուլ: Եւ ասէ կաքաւն.

— Մի՛ սպանանէր զիս, զի ես խաբեցից զբազում կաքաւս ու ածից յականատս քո:

Եւ ասէ որսորդն.

— Այժմ ստուգիւ մեռցիս ի ձեռաց իմոց, զի զսիրելիս եւ զազգականս քո մատնես ի մահ:

Բառարան

կալաւ — բռնեց

զենուլ — մորթել

ասէ — ասում է

զիս — ինձ

զի — որ, թե, որովհետև, որպեսզի

խաբեցից — խաբեմ, կխաբեմ, պիտի խաբեմ, խաբելու եմ

ածից — բերեմ, կբերեմ, պիտի բերեմ, բերելու եմ

ականատ — թակարդ

յականատ — (դեպի) թակարդները, թակարդներում

ստուգիւ — ստուգապես, իսկապես

մեռցիս — մեռնես, կմեռնես, պիտի մեռնես, մեռնելու ես

ի ձեռաց — ձեռքից

զսիրելիս — սիրելիներին

զազգականս — ազգականներին

մատնես — մատնում ես

ի մահ — մահվան

Հարցեր և առաջադրանքներ

1. Ճիշտ կարդա հետևյալ բառերը.

զբազում, զսիրելիս, յականատս:

2. Աշխարհաբար դարձրու հետևյալ բառերն ու բառակապակցությունները.

կաքաւ մի, մի՛ սպանաներ, զբազում կաքաւս, յականատս քո, ի ձեռաց իմոց, զսիրելիս եւ զազգականս քո:

3. Արտագրիր այս հարցերի պատասխանները.

Ի՞նչ բռնեց որսորդը:

Կաքավն ի՞նչ խոստացավ որսորդին:

Կաքավի խոստմանն ի՞նչ վերաբերմունք ցույց տվեց որսորդը:

4. Առակն աշխարհաբար դարձրու:(Թարգմանությունը բլոգումդ դիր, հղումն ուղարկիր a.nersisyan@mskh.am հասցեին)

5. Ինչպիսի՞ն է կաքավը (բնութագրիր կաքավին): Ի՞նչ է ցույց տալիս առակը:

6.Նույն բովանդակությամբ պատմություն հորինիր, որի հերոսները միայն մարդիկ են:(Պատմությունը բլոգումդ դիր, հղումն ուղարկիր a.nersisyan@mskh.am հասցեին)

(Գրաբարի առաջադրանքները ուղարկում եք իմ հասցեին)։